Arnar Pétursson

Hefur þú þjálfað stelpur áður?

Já ég hef þjálfað yngri flokka hjá ÍBV í tvö ár og er nú landsliðsþjálfari kvenna í handbolta.

Ef þú hefur þjálfað stelpur hver finnst þér stærsti munurinn á að þjálfa stelpur og stráka? 

Munurinn er ekki mikill að mínu mati. En ef ég á að nefna eitthvað þá vilja stelpur fá mun nánari útskýringar á því sem á að gera en strákar. Á meðan strákarnir fara af stað í t.d. ákveðnar æfingar og læra með því að gera, vilja stelpur fá það á hreint hvernig á að gera æfinguna og af hverju áður en farið er af stað.

Hver heldurðu að algengasta ástæðan sé að stelpur hætta í íþróttum? 

Ég held að hér sé um samspil margra þátta. Til að nefna eitthvað myndi ég byrja á öðrum áhugamálum sem hafa það í för með sér að áhugi á íþróttum fer þverrandi.

Hvað geta íþróttafélög gert til þess að bæta það að stelpur hætti? 

Íþróttafélögin geta gert margt. Að mínu mati er nauðsynlegt að íþróttafélögin hafi það í huga að á sama tíma og verið er að vinna að framförum í íþróttinni verði umhverfið að vera áhugavert. Ef iðkandinn hefur ekki gaman af því sem verið er að gera aukast líkurnar á því að hann hætti og finni sér eitthvað annað skemmtilegra að gera. Íþróttafélögin þurfa að vanda valið vel þegar kemur að þjálfurum og finna einstaklinga sem eru góðir kennarar/þjálfarar sem geta viðhaldið eðlilegri framþróun í íþróttinni en passað upp á að á sama tíma sé umhverfið skemmtilegt, spennandi og áhugavert.